Қазақстанда ауыл шаруашылығы өнімдерін қайта өңдеу көлемі артып, жаңа өндірістер іске қосылуда. Соның бірі – Түркістан облысында салынып жатқан «Huating Biotechnology Co., LTD» зауыты. Кәсіпорын мал сүйектерін, оның ішінде жергілікті бордақылау алаңдарынан жеткізілетін шикізатты терең өңдеп, май мен желатин өндіреді. Бұл туралы Ауыл шаруашылығы министрлігінің баспасөз қызметі хабарлады.
Жобаның жалпы құны 9 млрд теңге. Бірінші кезеңге 2,5 млрд теңге инвестиция тартылып, 30 тұрақты жұмыс орны ашылды. Зауыттың алғашқы кезеңін қыркүйек айында іске қосу жоспарланған.
Қазір құрылыс жұмыстары аяқталып, негізгі жабдықтар орнатылды.
Жобаның басты ерекшелігі – бұрын өндіріс қалдығы ретінде қаралған мал сүйектерін кәдеге жаратып, одан қосылған құны жоғары өнім өндіру. Алдағы уақытта инвестор сүйектен ыдыс-аяқ, жемшөп және басқа да өнімдер шығаруды жоспарлап отыр.
Сурет: АШМ
