Абай облысының әкімі Берік Уәлидің «Туған жерге туыңды тік» атты бастамасы өңір кәсіпкерлері тарапынан кең қолдау табуда. Форум қарсаңында жарияланған Үндеуге алғашқылардың бірі болып Көкпекті ауданының кәсіпкерлері үн қосты.
Іргелі іспен айналысып, ауыл шаруашылығының дамуына зор үлес қосып келе жатқан «Елімай» шаруа қожалығының басшысы Болат Бекбердинов облыс әкімінің бастамасын жүрекпен қабылдап, туған жерді түлетуге бағытталған шараның елдік пен ерлікке бастайтынын айтты.
«Форум қарсаңындағы Үндеуді ерекше ықыласпен оқып, туған топыраққа деген жауапкершілікті әр кәсіпкер жүрекпен сезінетініне тағы да көз жеткіздік. Мемлекет басшысының бастамаларын және Абай облысын дамыту бағытындағы жоспарларды толық қолдаймыз. Әсіресе, әлеуметтік нысандардың, жаңа ықшамаудандар мен мәдениет ошақтарының бой көтеруі – болашаққа салынған сенімді көпір деп білеміз», – деді кәсіпкер.
Ол туған өңірдің өркендеуіне үлес қосу – әр азаматтың парызы екенін айтып, алдағы форум аясында өңірлік инвестициялық жобаларды қарастыруға және нақты ұсыныстармен қатысуға дайын екенін жеткізді.
«Елдің ертеңі – біз жасаған бүгінгі істерге байланысты. Ендеше, туған жерге туымызды тігіп, Абай елінің абыройын асқақтатуға бірге атсалысайық», – деді Болат Бекбердинов.
Көкпектілік кәсіпкерлер осылайша өңірді дамытуға бағытталған үндеуге үн қосып, нақты қадамдар жасауға дайын екендерін білдірді.
Айта кетейік, Абай облысының әкімі Берік Уәли «Туған жерге туыңды тік» инвестициялық форумына өңірден шыққан кәсіпкерлерді шақырып, үндеу жолдаған еді.
