2026-жылы дамудың жаңа драйвері мал шаруашылығы болуы тиіс. Бұл туралы Ауыл шаруашылығы министрі Айдарбек Сапаров ведомствоның алқа отырысында айтты.
«2026-жылы дамудың жаңа драйвері мал шаруашылығы болуы тиіс. 300 млрд теңгеден астам қаржы қарастырылған Мал шаруашылығын дамытудың кешенді жоспары бекітілді. Оны іске асыру өндірістік тізбектің барлық буындары бойынша арзан кредиттік ресурстардың қолжетімділігін қамтамасыз етуге мүмкіндік береді», — деді министр.
Жеңілдетілген кредиттеу көктемгі егіс жұмыстарын қаржыландыру тетіктеріне ұқсас жүзеге асырылады.
2026-жылы ауыл шаруашылығы өнімдерін қайта өңдеу кәсіпорындары мен бордақылау алаңдарын 5%-бен, ал асыл тұқымды мал шаруашылығын дамытуды 6%-бен қаржыландыру жоспарланып отыр.
«Алдымызда ауқымды міндеттер тұр. Биыл ауыл шаруашылығы өндірісінің өсімін 5%-ға, азық-түлік өндірісінің өсімін 6%-ға жеткізуді жоспарлап отырмыз. Бұл ішкі нарықты қамтамасыз етуге және экспорттық әлеуетті кеңейтуге қосымша мүмкіндік береді», — деді Айдарбек Сапаров.
Сурет: ашық ақпарат көзі
