Премьер-министр Олжас Бектенов Үкімет отырысында көктемгі егін егуге дайындық мәселесі бойынша бірқатар тапсырма берді, деп хабарлады Ауыл шаруашылығы министрлігінің баспасөз қызметі.
Премьер-министр шаруалар несие алу үшін қажетті анықтамаларды қағаз түрінде тапсырмайтындай цифрлы нұсқаға көшу мәселесін көтерді. Ауыл шаруашылығы министрлігіне Цифрлық даму министрлігмен және «Бәйтерек» холдингімен бірлесіп, диқандарға тиімді әрі ашық мемлекеттік қолдау көрсету үшін жеңілдетілген несие берудің техникалық рәсімін оңайлатып, оны цифрлық форматқа ауыстыруды тапсырды.
Сонымен қатар, Олжас Бектенов Энергетика және Ауыл шаруашылығы министрліктері мен облыс әкімдіктері арзандатылған отынның тиісті көлемде жеткізілуін қатаң бақылауға алуы тиіс екенін ескертті.
“Әкімдіктер бір апта ішінде өңірлік операторлар туралы толық және өзекті мәліметтерді ұсынсын. Бөлінген жанар-жағармайдың талан-таражға түсуіне жол берген тұлғаларға қатысты құқық қорғау органдары барынша қатаң шаралар қабылдауы қажет”, — деді Үкімет басшысы.
Диқандарды тамшылатып және жаңбырлатып суару жүйесіне көшуге ынталандырып, су үнемдеу технологияларын енгізу жұмыстарын күшейту керектігін де Премьер-министр еске салды. Солтүстік және шығыс өңірлердің әкімдіктері қар тоқтату және су қорын жинау шараларын жүргізуі қажеттігі айтылды.
Экология министрлігіне егін егу мерзімдерін алдын ала жоспарлау және ауа-райының өзгеруіне жедел ден қойып, шаруаларға метеорологиялық болжамдарды уақтылы беру туралы тапсырма берілді.
Облыс әкімдіктеріне егін егу жұмыстарын жүргізу барысында агроөнеркәсіп кешеннің жалпы өнім көлемін екі есеге ұлғайту индикаторларына қол жеткізуді және орындауды қамтамасыз ету тапсырылды.
Бұл жұмыстарды үйлестіру Премьер-министрдің орынбасары – ұлттық экономика министрі Серік Жұманғаринге жүктелді.
Сурет: ашық ақпарат көзі
