Түркістан облысының Қазығұрт ауданында америкалық технология бойынша 5 мың басқа арналған ірі қара мал бордақылау кешені салынуда. Бұл туралы аймақ әкімдігінің баспасөз қызметі хабарлады. «Қарқын-2030» компаниясы жүзеге асырып жатқан жобаға 4,3 млрд теңге инвестиция салынған.
Қазіргі уақытта нысан ішінара пайдалануға беріліп, 3 700 бас ірі қара қабылдапты. Оның 2 500 басы бордақыланған. Кешен 16 гектар аумақты алып жатыр.
Жоба аясында өндірістік процестерді автоматтандыру, жем-шөп дайындау және қалдықтарды басқару жүйелерін енгізу көзделген. Кешенді толық қуатында іске қосу 2026 жылдың соңына жоспарланған.
Жоба өңірде ет өндірісін арттырып, ішкі нарықты отандық өніммен қамтамасыз етуге бағытталған.
Сурет: облыс әкімдігі
