Ақмола облысында майды сығымдау зауытын салу жөніндегі ірі инвестициялық жобаны іске асыру басталады, деп хабарлады Ауыл шаруашылығы министрлігінің баспасөз қызметі.
«Содружество Қазақстан» серіктестігі күнбағыс, рапс, соя және зығыр тұқымдарын терең өңдейтін жоғары технологиялық кәсіпорын құруды жоспарлап отыр.
Зауыт тәулігіне 3 мың тонна шикізатты өңдеп, жылына шамамен 1 млн тонна өнім шығармақ. Кәсіпорында жыл сайын 300 мың тоннаға дейін өсімдік майы және 400–500 мың тонна шрот пен жом өндіріледі.
Жобаға тартылатын инвестицияның жалпы көлемі 76 млрд теңгеге бағаланып отыр. Нәтижесінде 400-ге жуық жаңа жұмыс орны ашылады.
Компания директоры Александр Самойловтың айтуынша, бұл кәсіпорын майлы дақылдарды өңдеу нарығында алдыңғы қатарда.
«Біздің зауыт өңірді сапалы өсімдік майымен, сондай-ақ құс және мал шаруашылығында сұранысқа ие жанама өнімдер шрот пен жоммен қамтамасыз етеді», — деді ол.
Сурет: Agrotrend.kz
