Су ресурстары және ирригация бірінші вице-министрі Нұрлан Алдамжаров ҚР Президенті жанындағы Орталық коммуникациялар қызметінде өткен баспасөз конференциясында еліміздегі фермерлердің су үнемдеу технологияларын қолдану мәселесіне тоқталды, деп хабарлады ҚазАқпарат агенттігі.
Спикердің айтуынша, аграрлық секторда су тапшылығына байланысты аз су тұтынатын дақылдарға көшу міндеті қойылғанымен, бұл талап барлық өңірде толық сақталып отырған жоқ.
«Биыл біз жаңа Су кодексін қабылдадық. Бұл құжатта климаттың өзгеруі мен су ресурстарының азаюына байланысты су үнемдеуші технологияларды енгізу — міндетті талап ретінде көрсетілген. Бұл норманың орындалуы біз үшін басым бағыт», — деді Нұрлан Алдамжаров.
Сондай-ақ ол сөзінде ауыл шаруашылығы саласында суды көп қажет ететін дақылдарды азайту мәселесі бойынша Ауыл шаруашылығы министрлігімен бірлескен жұмыс жүріп жатқанын атап өтті.
«Бірақ, биыл кейбір өңір біздің ескертулер мен ұсынымдарға қарамастан, су ресурстары азайып жатқанын біле тұра, су көп қажет ететін дақылдарды көбірек егіп жіберді. Бұл туралы біз әлеуметтік желілерде де айттық. Мұндай жағдай бірінші кезекте трансшекаралық өзендерге тәуелді аймақтарда байқалды», — деді вице-министр.
Осыған байланысты қазан айынан бастап аталған бағытта ауқымды ақпараттық-түсіндіру жұмыстары жүргізілмек.
«Біз қазірдің өзінде Ауыл шаруашылығы министрлігімен бірге, қазан айынан бастап кең ауқымды түсіндіру жұмысын жүргізуді жоспарлап отырмыз. Алқаптарда суармалы суды көп талап ететін дақылдар азайтылуы тиіс. Әсіресе бұл — су тапшылығы бар өңірлер үшін аса маңызды», — деп түйіндеді ол.
Нұрлан Алдамжаровтың айтуынша, бұл бағыттағы бақылау мен жауапкершілік күшейтіледі. Су үнемдеу технологияларын енгізу — тек ұсыныс емес, міндетті норма.
