Мақта кластерін дамыту аясында Түркістан облысының Мақтаарал ауданында 2024-2030 жылдар аралығында құны 70 млрд теңге болатын 8 ірі жоба іске асырылады, деп хабарлады Ауыл шаруашылығы министрлігінің баспасөз қызметі.
Қуаты жылына 80 мың тонна мақта талшығы өндірілетін «ZHANASSYL» ЖШС зауыты 3 желтоқсанда пайдалануға берілді.
Зауыттың жанында Мақтаарал және Жетісай аудандарында 13 мақта қабылдау пункті жұмыс істейді. Астық жинау науқаны басталғалы бері 41 мың тоннадан астам мақта қабылданды.
Зауыт тәулігіне 600 тонна шитті мақта өңдейді және 180 тонна жоғары сапалы мақта талшығын, мақта линтін және басқа да өнімдерді шығарады.
Өнім ҚХР, Түркия, Еуропа, Тәжікстан, Иран және Қырғызстанға экспортталады.
Бұдан бөлек, жоба аясында кәсіпорында тамшылатып суару жүйесі мен мақта тұқымын қайта өңдеу өндірістерінің құрылысы жүргізілуде. Жобалардың жалпы құны 3 млрд. теңге. Оларды іске қосу 2025 жылға жоспарланған.
Сурет: АШМ
