Биыл А.И. Бараев атындағы астық шаруашылығы ғылыми-өндірістік орталығы аграрлық саладағы жаңа селекциялық жетістіктер мен технологиялық шешімдерге бірқатар патент рәсімдеді, деп хабарлады Ауыл шаруашылығы министрлігінің баспасөз қызметі. Бұл әзірлемелер құрғақ климат жағдайында өсімдік шаруашылығының тұрақтылығын арттыруға және өндіріс тиімділігін көтеруге бағытталған.
Жаңа сорттардың қатарында жалаң дәнді «Дамсинский» сұлысы, жаздық қатты «Торғай» бидайы, мал азықтық «Изумрудное» тарысы және тағамдық «Реноме» тарысы бар. Олардың барлығы Қазақстанның климаттық ерекшеліктерін ескере отырып шығарылған және құрғақшылыққа төзімділігімен, жығылмайтын беріктігімен әрі тұрақты өнімділігімен ерекшеленеді.
Әзірлеушілердің мәліметінше, бұл сорттарды енгізу агротехнологиялар мен ауа райы жағдайына байланысты өнімділікті 2–10 ц/га дейін арттыруға мүмкіндік береді.
Бұдан бөлек, майлы зығырды өсіру тәсілі де патенттелді. Бұл технологияда алдыңғы дақылдың егістігін жинауға дейін гербицидтік өңдеу қарастырылған. Мұндай тәсіл егістіктегі арамшөптердің мөлшерін азайтып, кейінгі дақылдың өнімділігін арттыруға және өсімдіктерді қорғау шығындарын оңтайландыруға жол ашады.
Әзірлемелерді Солтүстік және Солтүстік-Шығыс Қазақстан жағдайында қолдануға болады. Бұл аймақтар тәуекелді егіншілік аймағына жатады. Оларды енгізу фермерлерге өндірістің тұрақтылығын арттыруға, климаттық тәуекелдерді азайтуға және шаруашылықтардың экономикалық көрсеткіштерін жақсартуға көмектеседі.
Сурет: АШМ
