Қарағанды облысының Абай ауданында инвестиция көлемі 800 млн теңге болатын Alisha Group ет өңдеу кешенінің құрылысы аяқталды. Кәсіпорын салқындатылған және мұздатылған ет, консервілер мен вакуумдық қаптамадағы өнімдер шығаратын болады, деп хабарлады облыс әкімдігінің баспасөз қызметі.
Ет өңдеу кешені жылына 2400 тоннаға дейін өнім өндіруге есептелген. Кешенге мал сою пункті, ет өңдеу және консервілеу желісі, сондай-ақ қой фермасы кіреді. Мұнда тәулігіне 300 бас ұсақ және 50 бас ірі қара мал сойылып, еті өңделеді. Шикізат жергілікті фермерлерден сатып алынады, ал кейінірек өзінің шаруашылығын дамытпақ.
Alisha Group бас директоры Рустам Қалиевтің айтуынша, кәсіпорын сапа мен экспорттың жоғары стандарттарына бағдарланған.
«Кәсіпорында түрік өндірісінің екі желісі бар, ал өнімдер халал стандарттарына және тамақ қауіпсіздігінің халықаралық талаптарына сәйкес келеді. Бұл Қазақстан нарығына ғана емес, Парсы шығанағы, Еуропа және Қытай елдеріне жеткізілімдерді жолға қоюға мүмкіндік береді. Жобаның әлеуеті зор», — деді Рустам Қалиев.
Абай ауданында қайта өңдеуге арналған шикізат бар, жаңа кәсіпорында фермерлермен байланыс және ыңғайлы логистика жолға қойылған.
Бастапқыда мұнда 20 жұмыс орны құрылды, бірақ болашақта қызметкерлер санын кеңейту жоспарда бар.
Өндірісті кеңейту және етті терең өңдеу жоспарланған. Бұл кәсіпорынның ауқымы мен жүктемесін арттыруға көмектеседі, сонымен қатар жергілікті шаруашылықтарға қосымша табыс әкеледі.
Бұдан бөлек, 500 бас ірі қара мен 3 мың бас ұсақ малды бордақылау базасын, сондай-ақ терең өңдеудің жаңа кешенін салу үшін құжаттары әзірленіп жатыр.
Сурет: облыс әкімдігі
