Sustainable Fitch халықаралық рейтингтік агенттігі «Аграрлық несие корпорациясы» АҚ-на ESG-рейтингін 56 балмен ‘3’ деңгейінде берді. Берілген рейтинг орнықты дамудың жоғары деңгейін көрсетеді және Қазақстанның аграрлық секторын қолдаудағы, шағын және орта бизнес субъектілерін қаржыландырудағы Корпорацияның үлесін ескереді. Бұл туралы Корпорацияның баспасөз қызметі хабарлады.
Өз қорытындысында Sustainable Fitch Корпорацияның экологиялық көрсеткіштерді ашудағы ілгерілеуін, сондай-ақ тәуелсіз директорлардың қатысуымен және басқару функцияларын бөлумен басқару органдарының екі деңгейлі жүйесін қоса алғанда, корпоративтік басқарудың тиімді элементтерінің болуын атап өтті.
Сонымен қатар, Sustainable Fitch одан әрі жетілдіру бағыттарын, оның ішінде стратегиялық тәсілдерді дамыту және экологиялық мақсаттар қою бөлігін де көрсетті.
ESG-рейтингінің болуы Корпорация қызметінің ашықтығын арттырады және инвесторлар мен халықаралық қаржы институттарының сенімін нығайтады, «жасыл» және әлеуметтік қаржыландыруды неғұрлым тиімді шарттармен тарту мүмкіндіктерін кеңейте отырып, ақпаратты ашу және тәуекелдерді басқару критерийлеріне сәйкестігін растайды.
Анықтама: Sustainable Fitch – ұйымдардың тұрақты даму деңгейін бағалайтын халықаралық агенттік. ESG рейтингі компаниялардың тұрақты болашаққа қосқан үлесін көрсететін экологиялық, әлеуметтік және басқару факторларын талдауға негізделген.
