Қостанай облысының диқандары биыл 6 млн тонна астық және 1 млн тонна майлы дақыл жинады, деп хабарлады аймақ әкімдігінің баспасөз қызметі. Дәнді дақылдардың орташа өнімділігі гектарына 14,9 центнерден айналған.
Соңғы бес жылда өңірде майлы дақылдар алқабы 1,5 есеге, бұршақ дақылдарының егіс көлемі 3,3 есеге ұлғайған. Сонымен қатар 86,5 мың тонна картоп пен көкөніс жиналды.
Облыста көкөніс сақтау қоймаларының жалпы сыйымдылығы 87 мың тоннаға жетті. Соңғы бес жылда климаттық жабдықтармен қамтамасыз етілген қоймалардың қуаты 31%-ға артып, 47 мың тоннаны құрады.
Өңірде ауыл шаруашылығы өнімдерін терең өңдеу бағытында да ірі жобалар жүзеге асырылуда. Лисаков қаласында жылына 350 мың тонна шикізат өңдеп, 174 мың тонна май өндіретін зауыттың құрылысы жүргізілуде. Ал Б. Майлин ауданында жылына 365 мың тонна жемшөп ұны мен 219 мың тонна өсімдік майын өндіретін кешен салынуда.
Қостанай қаласында жылына 9 мың тонна шикізат өңдеп, 2,8 мың тонна мұздатылған фри картобын өндіретін кәсіпорын салынуда. Сондай-ақ келесі жылы жылдық қуаты 90 мың тонна болатын макарон фабрикасын іске қосу жоспарланған.
2025 жылдың қорытындысы бойынша Қостанай облысының үлесіне Қазақстандағы АӨК өңделген өнім экспортының 27%-ы және азық-түлік өндірісінің 13%-ы тиесілі болды. Өңір өңделген агроөнеркәсіптік өнім экспорты бойынша республикада бірінші, азық-түлік өндірісі бойынша екінші орында.
Сурет: Agrotrendkz














































