Даниядан сүтті бағыттағы асыл тұқымды сиырлардың алғашқы партиясы Ақтөбе әуежайына жеткізіліп, одан ары Батыс Қазақстан облысының Бәйтерек ауданына қарасты Белес ауылына жөнелтілді. Бұл туралы Ақжайық телеарнасы хабарлады.
Шетелден әкелінген малды «Игілік» мемлекеттік бағдарламасы аясында «Арыстанов» шаруа қожалығының басшысы сатып алған. 148 бас қашардың барлығы – «Қызыл дат» тұқымы. Бір бастың жеткізу шығынын қоса есептегендегі құны шамамен 2 миллион теңге.
Бұл – өңірдегі мал шаруашылығын дамытуға бағытталған ауқымды жұмыстың бір бөлігі. Негізгі мақсат – Батыс Қазақстан облысындағы ірі қара малдың тұқымдық сапасын арттырып, асыл тұқымды мал басын көбейту.
Айта кетерлігі, Батыс Қазақстан облысының шаруалары елімізде алғашқылардың бірі болып «Игілік» бағдарламасының мүмкіндігін пайдаланып, шетелден асыл тұқымды мал әкеліп отыр. Даниядан жеткізілген бұл сиырлар алдағы уақытта өңірдегі сүтті мал шаруашылығын дамытуға серпін береді деп күтілуде.
Сурет: Ақжайық телеарнасы
