Абай облысында Мемлекет басшысының 2024-2028 жылдары ауыл шаруашылығының жалпы өнім көлемін 2 есеге ұлғайту жөніндегі тапсырмасы аясында Үкімет бекіткен кешенді жоспарды іске асыру жұмыстары жүйелі түрде жүріп келеді. Облыс әкімдігі тарапынан ауыл шаруашылығы тауарын өндірушілермен бірлесе жүзеге асырылып жатқан тиімді мемлекеттік қолдау тетіктері мен кешенді жұмыстардың нәтижесінде 2025 жылы агроөнеркәсіп кешені тұрақты өсім көрсетті. 2024 жылы облыс Жол картасының нысаналы индикаторларының орындалуы бойынша республикада алдыңғы орында болса, 2025 жылдың қорытындысында алғашқы үштіктен көрінді. Бұл туралы аймақ әкімдігінің баспасөз қызметі хабарлады.
Өсімдік шаруашылығында егіс алқабы 789,3 мың гектарға жетіп, өткен жылмен салыстырғанда едәуір ұлғайған. Майлы дақылдардың көлемі 340,3 мың гектарға дейін жеткізілді. Көктемгі дала жұмыстарын жүргізу үшін «Кең дала» бағдарламасы аясында 14 млрд теңге бөлініп, оның басым бөлігі игерілген. Сонымен қатар, материалдық-техникалық базаны жаңарту мақсатында 700 бірлік жаңа техника сатып алынды.
Облыс әкімдігі Ауыл шаруашылығы министрлігімен бірлесіп 2026-2028 жылдарға арналған агроөнеркәсіптік кешеніндегі ірі инвестициялық жобалардың Жол картасын бекітті. 2029 жылға дейін жалпы құны 112,5 млрд теңгеге 19 инвестициялық жобаны жүзеге асыру жоспарланып отыр. Биыл аталған Жол картасына кіретін 6 жобаны іске асыру арқылы 400-ден астам жаңа жұмыс орны құрылмақ. Оның қатарында биыл ақпан айында іске қосылған «Агролидер KAZ» ЖШС бұршақты және басқа да ауыл шаруашылығы дақылдарын өңдеп, тазартатын зауыт бар.
Сонымен қатар, қайта өңдеу саласы бағытында іске қосылатын қуаттылығы жылына 11 400 тонна құрайтын 7,7 млрд теңгеге «Евразия Агро Семей» ЖШС базасындағы ет комбинаты, 72 000 тонна тазартылған күнбағыс майын шығаратын, құны 8,3 млрд теңгелік «Qazaq Astyq Group» ЖШС-нің ірі инвестициялық жобалары жоспарланған.
Облыста ет кластерін құру, сүтті-тауарлы фермалар салу, етті құс шаруашылығын дамыту және суармалы егіншілікті тиімді пайдалану бағытында 2031 жылға дейін агроөнеркәсіп кешен саласының инвестициялық жобаларының өңірлік пулы әзірленді. Өңірлік пулға сәйкес жалпы құны 254,0 млрд теңгеге 90 инвестициялық жобаны іске асыру көзделуде. Бұл бағытта биыл Бесқарағай ауданында құны 5,5 млрд теңгені құрайтын, жылына 150,0 млн дана жұмыртқа өндіретін құс фабрикасының құрылысы басталады. Сонымен қатар, Жарма ауданында құны 5,8 млрд теңгеге 600 басқа арналған және Бесқарағай ауданында құны 7,0 млрд теңгеге 1200 басқа арналған заманауи сүтті-тауарлы фермаларын іске асыру жобалары пысықталуда. Нәтижесінде 2 100-ден астам жаңа жұмыс орындары құрылады.
Сурет: облыс әкімдігі
