Абай облысында суармалы жерлердің көлемін арттыру және ауыл шаруашылығын тұрақты сумен қамтамасыз ету бағытында ауқымды жобалар жүзеге асырылуда. Бұл мәселе облыс әкімі Берік Уәлидің төрағалығымен өткен кеңейтілген аппараттық кеңесте қаралды, деп хабарлады аймақ әкімдігінің баспасөз қызметі.
Облыста Қазақстан Республикасының су саласын дамытудың кешенді жоспары аясында 6 жаңа су қоймасын салу, 1 су қоймасының құрылысын аяқтау, 7 су торабын және 29 магистральдық каналды жаңғырту жоспарланған.
Жаңа су қоймалары есебінен ауыл шаруашылығы айналымына қосымша мыңдаған гектар суармалы жер енгізіледі. Атап айтқанда, Ақсуат ауданындағы Қарғыба су қоймасы 5 132 гектар, ал Үржар ауданындағы Қарақол су қоймасы 6 558 гектар суармалы жерді қосымша игеруге мүмкіндік береді. Қалған бес су қоймасының іске қосылуы нәтижесінде 22 мың гектарға дейін суармалы жерді айналымға енгізу көзделіп отыр.
Жалпы іске асырылатын жобалар нәтижесінде облыста 55 мың гектар жаңа суармалы жер игеріліп, 223,7 млн текше метр су жинақталады. Сонымен қатар 374,5 шақырым магистральдық канал жөнделеді.
Су ресурстарын тиімді пайдалану арқылы суармалы егіншіліктің өнімділігін де арттыру көзделген. Атап айтқанда, 1 гектардан алынатын өнімділікті 16 центнерден 27 центнерге дейін жеткізу жоспарланып отыр.
Бұдан бөлек, Ертіс өзенінің гидропотенциалын тиімді пайдалану есебінен 2030 жылға дейін суармалы жерлердің көлемін қосымша 70 мың гектарға ұлғайту міндеті қойылған. Осы жұмыстар толық іске асқан жағдайда облыстағы суармалы жерлердің жалпы көлемі 238,4 мың гектарға дейін жеткізіледі.
Қазіргі таңда Бесқарағай және Жаңасемей аудандарында суармалы алқаптарды ауыл шаруашылығы айналымына енгізу, инвестиция тарту, ирригациялық инфрақұрылымды дамыту және су үнемдеу технологияларын енгізу бойынша жұмыстар жүргізілуде.
Облыс әкімі су шаруашылығы нысандарын жаңғырту жобаларын белгіленген мерзімде іске асыруды, суармалы жерлерді тиімді пайдалануды және жаңа алқаптарды ауыл шаруашылығы айналымына жедел енгізуді тапсырды.
Сурет: облыс әкімдігі
