ҚР Парламенті Мәжілісінің Аграрлық комитетінің көшпелі отырысы Жамбыл облысында өтті. Отырысқа депутаттар, ауыл шаруашылығы вице-министрі Аманғали Бердалин, аумақтық инспекциялар мен ветеринария басқармаларының басшылары қатысты, деп хабарлады ауыл шаруашылығы министрлігінің баспасөз қызметі.
Отырыста ветеринария саласын цифрландыру, өнімнің фермадан дүкен сөресіне дейінгі бақылану жүйесі, ветеринариялық пункттер, мал қорымдары және сою алаңдарын салу бойынша индикативтік көрсеткіштердің орындалуы мәселелері қаралды.
Байзақ ауданының Сарыкемер ауылында тиімді жұмыс істеуге қажетті барлық жабдықпен қамтылған жаңа ветеринариялық пункт ашылды. Ветеринариялық дәрігерлерге 50 жаңа автокөліктің кілті табысталды.
Депутаттар облыстық ветеринариялық зертхананың жұмысымен де танысты. Модернизация аясында антибиотиктердің қалдық мөлшерін анықтауға арналған жоғары тиімді сұйықтықтық хроматограф сатып алынды. Бұл өнім сапасының бақылауын арттырып, халықаралық стандарттарға сәйкестікті қамтамасыз етеді.
Сондай-ақ, сою алаңдарында және базарларда өнімнің бақылану жүйесі – АШЖБ және БАБЖА ақпараттық жүйелері арқылы қалай жүзеге асырылатыны көрсетілді.
Вице-министрдің төрағалығымен облыстық басқарма басшыларының қатысқан ветеринария мәселелері бойынша кеңес өтті. Кеңесте эпизоотиялық жағдай, цифрландыру барысы және ветеринариялық нысандар құрылысының орындалуы талқыланды.
Кеңес қорытындысы бойынша эпизоотиялық жағдайды бақылауды күшейту, ветеринариялық-алдын алу шараларын уақытылы жүргізу, мал қорымдарын талаптарға сай жаңғырту, ветеринариялық нысандарды интернетке қосуды жеделдету және Солтүстік Қазақстан облысының озық тәжірибесін басқа өңірлерде енгізу тапсырылды.
Сурет: АШМ
