Елімізде қант қызылшасын қабылдау және өңдеу науқаны жалғасуда. Бүгінгі күні Жетісу мен Жамбыл облыстарында орналасқан кәсіпорындар 225 мың тоннадан астам қызылша қабылдады. Бұл туралы Ауыл шаруашылығы министрлігінің баспасөз қызметі хабарлады.
Көксу қант зауытында өнімді қабылдау үрдісі тәулік бойы жүргізіледі. Кәсіпорын аумағында 4 түсіру техникасы мен 4 автотаразы жұмыс істеп тұр. Бұл жеткізілген шикізатты үздіксіз қабылдауды қамтамасыз етеді. Зауыттың зертханасы жедел талдау жасап, қызылшаның сапасын бақылайды, ал өнімді сақтау үшін жалпы аумағы 9 гектар болатын алаң дайындалған.
Қазіргі уақытта Ақсу қант зауыты 92 мың тонна, ал Меркі қант зауыты — 65 мың тонна өнім қабылдады.Жалпы, Жамбыл облысы мен Жетісу өңірінде қызылша егіс алқаптарының 37,8%-ы жиналған.
Қант зауыттары өндірістік қуаттары арттыру жұмыстарын жалғастыруда. Мәселен, Көксу қант зауыты 2027-жылға дейін жылдық өңдеу көлемін 250 мың тоннадан 500 мың тоннаға дейін арттыруды жоспарлаған. Жобаның жалпы инвестициялық көлемі 29 млрд теңге.
Ақсу қант зауытында да жаңғырту жұмыстары қолға алынған. Өткен жылы кәсіпорын 300 мың тоннаға дейін қызылша өңдеді, ал биыл 330 мың тоннаға жеткізбек. 2026-жылға қарай зауыттың тәуліктік қуатын 4,5 мың тоннаға дейін ұлғайту көзделген.
Сурет: Agrotrend.kz
