Батыс Қазақстан облысының ҚР АШМ ЖРБК жер ресурстарын басқару департаментінің жүргізген тексерісі нәтижесінде заңсыз берілген 4750 гектар жайылымдық жер мемлекет меншігіне қайтарылды, деп хабарлады Ауыл шаруашылығы министрлігінің баспасөз қызметі.
Тексеру барысында Казталов ауданы әкімі аппараты мен аудандық жер қатынастары бөлімінің бірқатар заң бұзушылықтарға жол бергені анықталды. Сегіз ауыл шаруашылығы өндірістік кооперативіне Қазақстан Республикасының Жер кодексінің нормалары сақталмай, жер учаскелері заңсыз берілген. Бұл алқаптар – халықтың ортақ пайдалануға арналған шабындықтар мен жайылымдар. Жер кодексінің 26-бабының 3-тармағына және «Жайылымдар туралы» Заңына сәйкес мұндай жерлер жеке меншікке немесе жеке жер пайдалану құқығына берілмейді, тек қана халықтың қажеттілігі үшін пайдаланылуы тиіс. Анықталған бұзушылықтарды жою туралы ұйғарым шығарылып, орындалды.
Cурет: Agrotrend.kz
