Агроөнеркәсіп кешеніндегі субсидиялардың барлық түрі бойынша берешек бүгінгі таңда 341,3 млрд теңге, оның 152,2 млрд теңгесі несиелердің пайыздық мөлшерлемелерін субсидиялауға тиесілі. 2023-жылдан бастап аграрлық секторды субсидиялауға арналған барлық шығындар жалпы сипаттағы трансферттер туралы заң шеңберінде жергілікті бюджеттердің қарауына берілген. Бұл туралы Ауыл шаруашылығы министрлігінің баспасөз қызметі хабарлады.
Ведомствоның мәліметінше, субсидиялар бойынша берешек барлық аймақта бар. Ең көп сома Ақмола, Қостанай және Солтүстік Қазақстан облыстарында, онда фермерлерге 173,7 млрд теңге немесе жалпы соманың 51%-ы төленуі тиіс.
Ауыл шаруашылығы министрлігі берешек субсидия біртіндеп қысқарып отырғанын мәлімдеді. Биыл 148,5 млрд теңге қарыз өтелген.
«2025-жылға жергілікті бюджеттерде АӨК субсидиялауға 433,6 млрд теңге қарастырылған, оның бір бөлігі өткен жылдардағы берешекті өтеуге жұмсалады. Ауыл шаруашылығы министрлігі аймақ әкімдіктеріне төлемдерді жеделдету үшін, оның ішінде қолданыстағы бағдарламалар мен өзге де ішкі резервтер шеңберінде қаражатты қайта бөлу есебінен қосымша қаражат қарастыруды ұсынды», — деп хабарлады министрлік.
Жергілікті бюджеттердің мүмкіндігі шектеулі екенін ескере отырып, Үкімет республикалық резерв қаражаты есебінен қосымша қолдау көрсетеді. 2024- жылы өңдеуге тапсырылған қант қызылшасын субсидиялауға 10 млрд теңге бөлінді. 2025-жылы қосымша 57,8 млрд теңге бөлінді, оның 48,4 млрд теңгесі тыңайтқыштардың құнын субсидиялауға, ал 9,4 млрд теңгесі қант қызылшасын өндірушілерді қолдауға берілді.
«Ауыл шаруашылығы өндірушілеріне субсидиялар төлеу жоспарлы режимде жалғасады. Ауыл шаруашылығы министрлігі өңірлердің әкімдіктерімен бірлесіп, берешекті қысқарту және субсидиялау тетігінің ашықтығын арттыруда жүйелі жұмыс жүргізуде. Басты мақсат – фермерлерді уақтылы қолдау және агроөнеркәсіп кешенді дамыту үшін тұрақты қаржылық жағдай жасау», — делінген Ауыл шаруашылығы министрлігі таратқан ақпаратта.
Сурет: Agrotrend.kz
