Қазақстан мен Түркия арасындағы ауыл шаруашылығы өнімдерінің тауар айналымы 2025 жылдың қорытындысы бойынша 25%-дан жоғары өсіп, шамамен 360 млн долларға жетті, сонымен қатар агроөнеркәсіп кешенде 1 млрд доллардан астам сомаға бірлескен инвестициялық жобалар жүзеге асырылуда, деп хабарлады ҚР Ауыл шаруашылығы вице-министрі Ермек Кенжеханулы.
Вице-министр атап өткендей, екі ел арасындағы ынтымақтастық стратегиялық сипатқа ие және тұрақты өсімді көрсетіп келеді. Түрік нарығына қазақстандық экспорттың негізін дәнді және дәнді-бұршақты дақылдар құрайды. 2025 жылы бұршақ дақылдарын жеткізу 395 мың тоннаға жетті. Ермек Кенжеханұлы Қазақстан осы өнімнің экспортын ұлғайтуға ниетті екенін атап өтті. Бұл, соның ішінде егіс алқаптарын әртараптандырумен және дәнді-бұршақты дақылдар өндірісінің ұлғаюымен байланысты.
«Қазақстанда ауыл шаруашылығы дақылдарын әртараптандыру аясында біз дәнді-бұршақты дақылдар үшін егіс алқаптарын ұлғайтып жатырмыз. Сондықтан түрік тарапымен келіссөздер шеңберінде дәнді-бұршақты дақылдарды жеткізу көлемін ұлғайтуға дайын екенімізді мәлімдедік. Жалпы, түрік серіктестер тарапынан қызығушылық бар және ортақ ынтымақтастық аясында біз осы бағытта одан әрі жұмыс істейтін боламыз», — деді вице-министр.
Сондай-ақ мал шаруашылығы өнімдерін экспорттау бөлігінде де үлкен әлеует бар. Қазіргі уақытта қазақстандық сиыр етін жеткізу үшін түрік нарығын зерделеу жұмыстары жүргізілуде. Вице-министрдің айтуынша, бұл шетелдік нарықтарда отандық өнімнің қатысуын едәуір кеңейтуге мүмкіндік береді.
Сонымен қатар, қазіргі уақытта бірқатар ірі инвестициялық жобалар жүзеге асырылуда.
Вице-министр тараптар жаңа бастамаларды талқылауды жалғастырып жатқанын айтты. Атап айтқанда, түрік компаниясының қатысуымен қант зауытын салу туралы келіссөздер жүргізілуде.
Сурет: ашық ақпарат көзі
