Аймақта агроөнеркәсіп кешені саласындағы ірі инвестициялық жоба аяқталды, деп хабарлады Ауыл шаруашылығы министрлігінің баспасөз қызметі.
«Алтай ауданының Полянское ауылында 1 075 бас сауын сиырға арналған тауарлы сүт фермасы іске қосылды. «Мойылды-Байқоңыр» серіктестігіне қарасты жоба АӨК инвестициялық жобаларды қаржыландыру бағдарламасы аясында жүзеге асырылды. Жобаның жалпы көлемі 4,7 млрд теңге. Қаржы өндірістік нысандарды салуға, заманауи технологиялық жабдықтар мен ауыл шаруашылығы техникаларын сатып алуға, сондай-ақ асыл тұқымды ірі қара малын алуға бағытталды», — делінген хабарламада.
Сүт фермасын іске қосу кезең-кезеңімен жүргізілуде. Жақын күндері асыл тұқымды малдың кезекті партиясын жеткізілмек. Жаңа жылға жеткізбей алғашқы өнімді алу да жоспарланып отыр.
Сүт фермасы құнарлы мал азығымен қамтамасыз етілген. Шаруашылықтың 2 323 гектар егістік жері бар.
Сурет: АШМ
