Қызылорда облысында «Харвест» компаниясының шамамен 23 мың гектар суармалы жерді игеруге бағытталған ірі жобасы жүзеге асырыла бастады. Осыған байланысты өңірде суару жүйелерін өндіруді жергілікті деңгейде ұйымдастыру мәселесі қарастырылуда.
Бұл туралы облыс әкімі Нұрлыбек Нәлібаев америкалық Reinke Manufacturing Co., Inc. компаниясының вице-президенті Филип Джарвиспен кездесуде мәлімдеді.
Әкімнің айтуынша, жобаның алғашқы кезеңінде кемінде 450 дана суару жүйесі қажет болады. Ал екінші кезеңде 35 мың гектар аумақта 700-ге жуық суару жүйесін пайдалану жоспарланып отыр.
«Reinke Manufacturing Co., Inc компаниясының ауыл шаруашылығына арналған ирригациялық жабдықтар мен механикалық суару жүйелерін өндіруге маманданғанын жақсы білеміз. Осыған байланысты біз үшін өңірде осы жабдықтардың өндірісін жергіліктендіру мәселесі аса маңызды», – деді аймақ әкімі.
Оның айтуынша, негізгі тұтынушы орналасқан өңірде өндірісті шоғырландыру – ең тиімді шешім. Бұл ірі көлемді жабдықтарды тасымалдау шығындарын азайтып, сервистік қызмет көрсетуді жеделдетуге мүмкіндік береді.
Өңір басшысы инвесторларды Қызылорда облысын перспективалы өндірістік алаң ретінде қарастыруға шақырды.
«Біз өз тарапымыздан жобаға қызығушылық танытқан инвесторларға барлық кезеңде жан-жақты қолдау мен толық сүйемелдеуді қамтамасыз етеміз», – деді Н.Нәлібаев.
