Жыл басынан бері 1,15 млн га пайдаланылмаған және заң бұзушылықтармен берілген ауыл шаруашылығы жерлері мемлекеттік қорға қайтарылды. Бұл туралы Жер ресурстарын басқару комитетінде хабарлады.
«Жер пайдаланушыларға қатысты 1,33 млн га жерде 875 жоспардан тыс тексеру жүргізілді, 836,7 мың га жерде 614 нұсқама енгізілді, 48 материал сот органдарында қаралуда. Тиісті шаралар қабылданғаннан кейін жер пайдаланушылар 217,5 мың га жерде ауыл шаруашылығы жерлерін игере бастады. Жалпы, жыл басынан бері қайтаруға жоспарланған 2 млн га ауыл шаруашылығы жерінің 1,15 млн га қайтарылды», — деді Жер ресурстарын басқару комитетінің төрағасы Мұрат Теміржанов АШМ-де өткен кеңесте.
Ол кейбір өңірлерде ауыл шаруашылығы жерлерін қайтару жоспарын орындаудың төмен көрсеткіштері байқалатынын атап өтті. Атап айтқанда, Шығыс Қазақстан облысында жоспарланған 160 мың га жердің тек 48,1 мың га қайтарылды, Атырау облысында — 90 мың га жердің — 16,8 мың га қайтарылды.
Алты ай ішінде жер қатынастары субъектілеріне, жергілікті атқарушы органдарға және «Азаматтарға арналған үкімет» мемлекеттік корпорациясының филиалдарына қатысты 2685 тексеру жүргізілді. Жер заңнамасын бұзудың 2174 жағдайы анықталып, 231,4 млн теңге айыппұл салынды.
1711 заңсыз жер учаскелерін беру туралы шешімдер анықталды, оларды жою қажет. Сондай-ақ жерлерді мақсатсыз пайдалану, жерді бүлдіру және т.б. фактілер бар.
Сонымен қатар, Теміржанов топырақ, геоботаникалық зерттеулер, топырақ бонитировкасы, цифрлық ауыл шаруашылығы контурлық жоспарларын және фотокарталарды жасау жұмыстары жүргізіліп жатқанын атап өтті.
«Барлық бағыттар бойынша жұмысты күшейту, жедел шешуді талап ететін өзекті мәселелерді бақылауға алу қажет. Сондай-ақ ГИПРОЗЕМ жұмыстарының нәтижелерін мемлекеттік жер кадастрының ақпараттық жүйесінде орналастыру қажет», — деп тапсырды АШМ басшысы Айдарбек Сапаров.
