Былтыр Қостанай облысында қуаттылығы 46 мың тонна болатын 7 заманауи өнеркәсіптік тауарлы сүт фермасы пайдалануға берілді. Қазіргі уақытта жалпы қуаттылығы 34 мың тонна болатын тағы осындай 6 ферма салынуда. Оның 5-еуі биыл іске қосылады, ал жыл соңына дейін тағы 4 ферманың құрылысы басталады. Бұл туралы облыс әкімдігінің баспасөз қызметі хабарлады.
Биылғы жылдың соңына дейін Қостанай ауданында 1000 және 400 басқа арналған екі тауарлы сүт фермасы пайдалануға беріледі:
- «Надеждинка» ЖШС – жылдық қуаттылығы 7,5 мың тонна, инвестиция көлемі 4,2 млрд теңге, 40 жаңа жұмыс орны;
- «ДК Мақсат KZ» ЖШС – жылдық қуаттылығы 4,4 мың тонна, инвестиция көлемі 3,2 млрд теңге, 32 жаңа жұмыс орны.
«Барлық тауарлы сүт фермалары жобалық қуатына шыққаннан кейін ұйымдасқан шаруашылықтардағы сүт өндірісі 2 есеге артады. Сонымен қатар, сүт өңдеу кәсіпорындарының жүктемесі 75%-дан 86%-ға дейін ұлғаяды. Қостанай ауданында аталған екі ферманың іске қосылуы нәтижесінде кәсіпорындар жобалық қуатына жеткен кезде жылдық сүт өндірісі 32 мың тоннадан 44 мың тоннаға дейін артады», – деп атап өтті облыс әкімі Құмар Ақсақалов.
Сурет: облыс әкімдігі
