Абай облысы әкімінің орынбасары Думан Оспанов Бесқарағай ауданындағы бірқатар ірі ауыл шаруашылығы құрылымдарының өндірістік және ғылыми жетістіктерімен танысты, деп хабарлады ауданның баспасөз қызметі.
Сапар аясында делегация өкілдері Ерназар ауылындағы асыл тұқымды жылқы өсірумен айналысатын «Мукинов» шаруа қожалығына барды. Шаруашылықта жүргізіліп жатқан селекциялық жұмыстардың нәтижесінде 2022-жылы «Бесқарағай» деп аталатын қазақы жылқының жаңа типі шығарылған. Гендік негізіне байланысты Шойынқара және Байторы атаулары берілген бұл жылқылар кез келген ауа райына төзімділігімен, ірілігімен, етті және сүттілігімен ерекшеленеді. Айғырлары 700 келіге дейін, биелері 600 келіге дейін салмақ тартады. Бұл жылқы тұқымы мініске де, жегінге де төзімді.
Айта кету керек, жаңа типті қалыптастыру бағытындағы селекциялық жұмыстарға Қазақ ұлттық аграрлық университеті мен Шәкәрім университеті ғалымдары ғылыми қолдау көрсеткен. Қазақы жылқыларды будандастыру арқылы жаңа тип шығару жұмыстары бұл өңірде 1968-жылдан бері жүйелі түрде жүргізіліп келеді.
Сонымен қатар, шаруашылық былтыр «Ертіс» деп аталатын қазақы жылқы тұқымының жаңа зауыттық типін таныстырып, Бесқарағай ауданында жылқы шаруашылығын ғылыми негізде дамытудың екінші маңызды кезеңін жүзеге асырды. Қазіргі таңда қожалықта қазақтың ақ бас сиырынан өңірдің табиғи жағдайына бейімделген жаңа тип шығару бағытында ғылыми зерттеу жұмыстары жүргізіліп жатыр.
Жұмыс сапары барысында облыс әкімінің орынбасары «Қалиқанұлы» шаруа қожалығының да қызметімен танысты. Аталған қожалық 2024-жылы тауарлы сүт фермасын кеңейту мақсатында 1 миллиард теңге көлемінде жеңілдетілген несие алып, өндірістік инфрақұрылымды жаңғыртқан және асыл тұқымды мал басын көбейтіп, техника паркін толықтырған.
Бұл бастамалар өңірде агроөнеркәсіп кешенін дамытуға, ауыл шаруашылығын ғылыми негізде ілгерілетуге және экономикалық әлеуетті арттыруға бағытталған нақты қадамдар ретінде бағаланды.
Сурет: аудан әкімдігі
