Бүгін Семейдегі Шәкәрім университетінде ветеринария қызметкерлері күніне арналған салтанатты іс-шара өтті. Жиынға облыс әкімі Берік Уәли, ветеринария саласының мамандары мен ардагерлері қатысты. Бұл туралы аймақ әкімдігінің баспасөз қызметі хабарлады.
Облыс әкімі құттықтау сөзінде ветеринария қызметкерлерінің еңбегіне жоғары баға беріп, олардың азық-түлік қауіпсіздігін нығайтуға зор үлес қосып келе жатқанын атап өтті.
«Ветеринария саласы – агроөнеркәсіп кешенінің тұрақты дамуының, мал шаруашылығының өркендеуінің және халықтың санитариялық-эпидемиологиялық қауіпсіздігінің берік негізі. Сіздер күн сайынғы қажырлы еңбектеріңізбен өңіріміздің эпизоотиялық тұрақтылығын қамтамасыз етіп, мал шаруашылығы өнімдерінің қауіпсіздігін сақтауға, ауыл халқының әл-ауқатын арттыруға және еліміздің азық-түлік қауіпсіздігін нығайтуға зор үлес қосып келесіздер. Бұл – үлкен жауапкершілік пен жоғары кәсібилікті талап ететін маңызды қызмет. Мемлекет басшысы ауыл шаруашылығы саласын дамытуға және ветеринариялық қызметтің әлеуетін арттыруға ерекше назар аударып келеді. Осы саясат аясында Абай облысында да ветеринария саласын жаңғыртуға бағытталған ауқымды жұмыстар кезең-кезеңімен жүзеге асырылуда. Сіздердің жанқиярлық еңбектеріңіз, кәсібиліктеріңіз, жоғары жауапкершіліктеріңіз бен ел игілігі жолындағы адал қызметтеріңіз ерекше құрметке лайық. Қандай жағдайда болмасын өз міндеттеріңізге деген адалдықтарыңыз үшін баршаңызға шынайы ризашылығымды білдіремін», – деді Берік Уәли.
Салтанатты шара барысында облыстың мал дәрігерлеріне лайықты құрмет көрсетілді. Осы салаға ерекше еңбек сіңірген жандар Ауыл шаруашылығы министрлігінің «Еңбек ардагері» медалімен, Құрмет грамотасымен, «Абай облысына сіңірген еңбегі үшін» төсбелгісімен және облыс әкімінің Алғыс хатымен марапатталды.
Ерекше атап өтерлігі, салтанатты шара барысында өңір тарихында алғаш рет ветеринариялық қызметке 53 жаңа автокөліктің кілті табысталды. Облыстық ветеринария қызметі мен аудандық ветеринария бөлімдеріне JAC T-8 маркалы 12 қызметтік автокөлік, өңірдегі ветеринариялық пункт меңгерушілеріне 30 Нива мен 5 мал тасымалдайтын арнайы автокөлік, 5 дезинфекция жүргізуге арналған арнайы техника және 1 ветеринариялық препараттарды тасымалдауға арналған арнайы автокөлік берілді. Сондай-ақ, 77 тоңазытқыш, 260 термочемодан және 74 компьютерлік техника жиынтығымен қамтамасыз етілді.
«Бүгінгі салтанатты шараның өзіндік тарихи маңызы бар. Сіздердің мерекелеріңіз қарсаңында өңір тарихында алғаш рет ветеринариялық қызметке жаңа, 53 қызметтік автокөліктер табысталғалы отыр. Бұл – ветеринария саласына көрсетіліп отырған нақты қолдаудың жарқын көрінісі. Жаңа автокөліктер шалғай ауылдық округтерде еңбек ететін мамандардың мобильділігін арттырып, түрлі мал ауруларының алдын алу және ветеринариялық іс-шараларды уақтылы әрі сапалы жүргізуге мүмкіндік береді. Айта кету керек, ветеринария саласының материалдық-техникалық базасы сын көтермейтін жағдайда болатын. Биыл бұл бағыттағы жұмыстар қайта жанданып, ветеринариялық ұйымдарды кезең-кезеңімен заманауи құрал-жабдықтармен қамтамасыз ету қолға алынды. Бұл салаға соңғы рет 2013 жылы жаңа техникалар берілген екен. Ол техникалардың көпшілігінің тозығы жетіп тұр. Бүгінгі жаңа техникалар сала мамандардың жұмысына тың серпін береді деп ойлаймыз», – деді аймақ басшысы.
Жаңа көлікке ие болған ветеринария қызметкерлері өз ризашылықтарын жеткізді.
«Ветеринария саласында еңбек етіп жүргеніме 40 жылдан асты. Мемлекет тарапынан ветеринария қызметіне көрсетіліп отырған қолдау мен бүгінгі құрмет – біз үшін үлкен мәртебе. Бұл – сала мамандарының еңбегіне берілген жоғары баға. Мұндай деңгейдегі қолдау бұрын-соңды көрсетілген емес. Алдағы уақытта да өз ісімізге адал болып, ел игілігі үшін еңбек ете береміз», – деді Абай ауданы Көкбай ауылдық округінің ветеринариялық пунктінің меңгерушісі Жақып Рымғазы.
«Бүгін бізде тарихи күн, тарихи сәт. Мен жұмыс істеген уақыттан бастап осындай жаңа автокөліктің кілтін алмаған едік. Сондықтан ауданымызда ветеринария саласы дамып, мамандарымыздың жұмысы бұрынғыдан ширай түседі деген ойдамын. Қолдауларыңызға рахмет. Мал-жанымыз аман болсын. Төрт түлігіміз түгел болсын», – деді Жаңасемей аудандық бөлімінің ветеринарлық маманы Мәдина Мұратбекова.
Бүгінде облыста ветеринариялық инфрақұрылымды дамытуға ерекше көңіл бөлініп отыр. Биыл өңірде 7 ветеринариялық станция, 61 ветеринариялық пункт және 40 мал қорымының құрылысы салынуда. 2027 жылы тағы 50 ветеринариялық пункт пен 78 мал қорымын салу жоспарланып отыр. Мал дәрігерлері мамандарын даярлауға да баса назар аударылып келеді. Былтыр облыс әкімінің 5 гранты ауыл шаруашылығы мамандықтары мен ветеринария саласына бөлінді. Биыл грант саны 19-ға ұлғайтылып отыр (оның ішінде нақты ветеринария мамандығына былтыр 2 грант болса, биыл 8 грант).
Сурет: облыс әкімдігі
