Қызылорда облысының Арал қаласында «Kazakh Camel» компаниясының түйе сүтінен құрғақ ұнтақ өндіретін жаңа зауыты пайдалануға берілді. Құны 3 млрд теңгені құрайтын инвестициялық жоба өңірдің агроөнеркәсіптік әлеуетін арттырып, мал шаруашылығын дамытуға тың серпін береді. Бұл туралы облыс әкімдігінің баспасөз қызметі хабарлады.
Жаңа кәсіпорынның жылдық өндірістік қуаты 400 тонна өнім. Зауыттың толық қуатта жұмыс істеуі үшін тәулігіне 20 мың литрге дейін түйе сүті қажет болады. Бұл өңірдегі түйе шаруашылығымен айналысатын шаруалар үшін тұрақты табыс көзін қалыптастырып, ауыл тұрғындарының әл-ауқатын арттыруға мүмкіндік береді.
Өнімді өткізу бағытында да маңызды қадам жасалды. Компания өндірілген құрғақ түйе сүті ұнтағын Қытай нарығына экспорттау үшін 10 жылдық келісімшартқа қол қойған.
Мемлекеттік қолдау аясында кәсіпорынға индустриялық аймақтан көлемі 1 гектар жер телімі бөлінген. Сонымен қатар, Қытайдан заманауи технологиялық жабдықтарды сатып алу үшін Өнеркәсіпті дамыту қоры арқылы 1,8 млрд теңге көлемінде қаржыландыру қарастырылған.
Қызылорда облысы әкімдігінің мәліметінше, алдағы үш жылда өңірде жалпы құны 1,9 трлн теңгені құрайтын 48 инвестициялық жоба жүзеге асырылады. Соның нәтижесінде 10 мыңнан астам жаңа жұмыс орны ашылады деп жоспарлануда. Ал биылдың өзінде жалпы құны 100 млрд теңге болатын 21 жобаны іске қосу көзделген.
Сурет: облыс әкімдігі
