Абай облысында құрылатын арнайы экономикалық аймақтың бастапқы кезеңдегі аумағы 600 гектар болса, кейін 1 мың гектарға дейін кеңейтіледі. Бұл бастамаға үкімет қолдау көрсетті, деп хабарлады өңір әкімдігінің баспасөз қызметі.
АЭА-ның басым бағыттары ретінде агроөнеркәсіп кешені, логистика, көлік-хаб қызметтері және өңдеуші өнеркәсіп белгіленді. Аймақ аумағында бірқатар ірі инвестициялық жобаларды жүзеге асыру жоспарланып отыр.
Облыс әкімі Берік Уәли мәлім еткендей, 2025 жылдың басынан бері өңірдің инвестициялық пулына енгізілген жобалар саны 29-дан 112-ге дейін артқан, ал инвестициялардың жалпы көлемі 2,2 трлн теңгеден 4,3 трлн теңгеге өскен.
Оның айтуынша, 2026 жылы өңірде жалпы құны 131,2 млрд теңге болатын 41 инвестициялық жобаны іске асыру жоспарланған. Нәтижесінде 3 мыңнан астам жаңа жұмыс орны ашылады деп күтілуде.
Инвесторлардың өндірістік нысандарды орналастыруға деген қызығушылығының артуына байланысты «Өндіріс» индустриялық аймағының аумағы 96 гектардан 190 гектарға дейін кеңейтілді. Сонымен қатар, шағын және орта бизнес субъектілері үшін шағын өнеркәсіптік парк құру мәселесі де қарастырылып жатыр.
Сурет: облыс әкімдігі
