Түркістан облысында жалпы құны 534,2 млрд теңгені құрайтын заманауи өнеркәсіптік жылыжай кешендерін салу бойынша үш ірі инвестициялық жоба жүзеге асырылып жатыр, деп хабарлады Ауыл шаруашылығы министрлігінің баспасөз қызметі.
Олар Қазақстанның маусымаралық кезеңдегі жаңа піскен көкөніске деген сұранысын толық қамтамасыз етпек.
Жылыжай кешендері пайдалануға берілген соң өңірдегі жылыжай өнімінің өндірісі жылына 102 мың тоннаға артады. Сонымен қатар 1 225 тұрақты жұмыс орны ашылады.
Бүгінде Түркістан облысы жылыжай шаруашылығын дамыту бойынша еліміздегі көшбасшы өңір саналады. Облыстағы жабық топырақтың жалпы аумағы 1006,7 гектар. Бұл – республикадағы жалпы көрсеткіштің 72 пайызы. Өткен жылы өңірдің жылыжай кешендерінде 113 мың тоннадан астам көкөніс өндіріліп, маусымаралық кезеңде ішкі нарықтағы сұраныстың 45 пайызы қамтамасыз етілді.
Биыл жылдың алғашқы төрт айында өңір диқандары жылыжайларда өсірілген 38,2 мың тонна өнім жинаған.
Сурет: АШМ
