Қызылорда облысының әкімі Мұрат Ергешбаев Ыбырай Жақаев атындағы Қазақ күріш шаруашылығы ғылыми-зерттеу институты серіктестігінің егіс алқабына барды, деп хабарлады аймақ әкімдігінің баспасөз қызметі.
Аймақ басшысына институттың ғылыми-зерттеу және өндірістік қызметі, күріш шаруашылығында қолданылатын агротехнологиялар мен су ресурстарын тиімді пайдалану бағытындағы жұмыстар таныстырылды.
Ыбырай Жақаев атындағы Қазақ күріш шаруашылығы ғылыми-зерттеу институты 2015 жылдан бері Ұлттық аграрлық ғылыми білім беру орталығы құрамындағы еншілес ұйым ретінде жұмыс істеп келеді. Күріштің бірегей, элиталық, бірінші репродукциялы тұқымын өндіру және өткізумен айналысады.
Қазір мекемеде 118 адам еңбек етеді, 20 ғылыми қызметкер бар. Ғылыми құрамда 5 ғылым докторы, 2 ғылым кандидаты, 1 PhD докторы және 8 магистр қызмет атқарады. Сонымен қатар 8 жас ғалым ғылыми-зерттеу жұмыстарын жүргізуде.
Облыс әкімі жауапты сала басшыларына су үнемдеу технологияларын кеңінен енгізуді, ғылыми жаңашылдықтарды өндірісте тиімді пайдалануды және жұмысты сапалы әрі мерзімінде орындауды тапсырды.
Айта кету керек, биыл облыста жалпы 185,8 мың гектарға, дәнді дақылдар 89,7 мың гектарға, майлы дақылдар 6,1 мың гектарға, мал азығы дақылдары 73,2 мың гектарға, ал картоп, көкөніс және бақша дақылдары 16,8 мың гектарға егілді.
Мемлекет басшысының тапсырмасына сәйкес, өткен жылмен салыстырғанда күріштің егіс көлемі 10,9 мың гектарға қысқартылып, 70 мың гектарға себу жоспарланған.
Сурет: облыс әкімдігі
