Қазақстан Республикасы Премьер-министрінің орынбасары – ұлттық экономика министрі Серік Жұманғарин Астанада өткен Қазақстан-Моңғолия бизнес форумында сөз сөйледі, деп хабарлады primeminister.kz.
Қазақстан мен Моңғолия жан басына шаққанда жермен қамтамасыз ету деңгейі бойынша әлемде көшбасшы орынға ие. Мал шаруашылығын дамыту, ауыл шаруашылығы өнімін қайта өңдеу, ветеринария, техника жеткізу мен заманауи агротехнологияны енгізу басым бағыттар қатарына жатады.
Серік Жұманғарин Моңғолия Премьер-министрінің бірінші орынбасары – экономика және даму министрі Жадамбын Энхбаярмен екіжақты кездесу өткізді. Тараптар сауда және агроөнеркәсіп кешеніндегі бірлескен жобаларды жүзеге асыру перспективасын, сондай-ақ бірлескен өндіріс құру мәселесін талқылады. Атап айтқанда, Моңғолия аумағында ветеринариялық вакцина өндіретін кәсіпорынды іске қосу, сондай-ақ Қазақстанда кашемирден жасалған бұйым мен ет өнімін өндіруді ұйымдастыру бастамасы қаралды.
Сурет: primeminister.kz
