Бүгін Абай облысы әкімінің орынбасары Думан Оспанов агроөнеркәсіп кешенге ғылыми инновацияларды енгізу мәселелері бойынша ғалымдармен кездесті.
Олардың қатарында «Ұлттық аграрлық ғылыми-білім беру орталығы» басқарма төрағасының орынбасары Максим Сутула, «Қазақ қайта өңдеу және тамақ өнеркәсібі ғылыми-зерттеу институты» ЖШС басқарма төрағасы Жұматай Оразбаев, «Қазақ қайта өңдеу және тамақ өнеркәсібі ғылыми-зерттеу институты» ЖШС Семей филиалының директоры Ануарбек Сүйчинов және салаға қатысты басқа да басшылар болды.
Онда тамақ өнеркәсібін дамыту саласына ғылыми инновацияларды енгізу мәселелері егжей-тегжейлі талқыланды. Ғалымдар өз ұсыныстарын ортаға салып, кейбір мәселелер бойынша әкімдік тарапынан қолдау қажеттігін жеткізді.
Кездесу соңында облыс әкімінің орынбасары Думан Оспанов аймақта тамақ өнеркәсібін дамыту үшін ғылым мен тың технологиялардың орны маңызды екенін атап өтті. Өндіріс пен ғылымды ұштастырып, сапалы өнім шығару жолында әкімдік тарапынан жан-жақты қолдау көрсетілетінін айтты.
Айта кетейік, Мемлекет басшысы Қасым-Жомарт Тоқаев халыққа Жолдауында үш жылдың ішінде агроөнеркәсіп кешеніндегі қайта өңделген өнімнің үлесін 70 пайызға дейін арттыру міндетін қойған болатын. Сондай-ақ аграрлық ғылымды дамыту мәселесіне де ерекше ден қою керегін тапсырған еді.
Бүгінгі таңда Абай облысының әкімі Берік Уәлидің бастамасымен Жаңасемей ауданында қуаттылығы жылына 11 400 тонна ет және ет өнімдерін терең өңдейтін өндірістік кешеннің құрылысы қарқынды жүргізілуде. Бұл жоба өңірдің ауыл шаруашылығы мен азық-түлік өнеркәсібін дамытуға тың серпін бермек.
Сурет: Agrotrend.kz
