Жетісу облысында қант қызылшасы егістігін кеңейтіп, Ақсу және Көксу қант зауыттарының қуатын екі есеге, 950 мың тоннаға дейін ұлғайту жұмыстарын жүргізуде. Облыстың әлеуметтік-экономикалық даму барысы туралы Мемлекет басшысы Қасым-Жомарт Тоқаевқа аймақ әкімі Бейбіт Исабаев баяндады, деп хабарлады Ақорданың баспасөз қызметі.
Бейбіт Исабаевтың айтуынша, 2025 жылы өңірге 610 млрд теңге инвестиция тартылған. Бұл 2024 жылдың көрсеткіштерінен 12,8%-ға жоғары.
2027 жылға дейін жалпы сомасы 94,4 млрд теңге болатын 23 инвестициялық жобаны іске асыру жоспарланған. Атап айтқанда, құс фабрикаларын, бордақылау алаңдарын, балық және жылыжай шаруашылықтарын және басқа да нысандарды салу көзделген.
Өнеркәсіпте соңғы үш жылда 29 жаңа нысан іске қосылды және жеті жұмыс істеп тұрған өндіріс кеңейтіліп, 1 841 жұмыс орны ашылған.
Сурет: ашық ақпарат көзі
