Қазақстан Республикасының делегациясы Ауыл шаруашылығы вице-министрі Аманғали Бердалиннің жетекшілігімен Еуропадағы ең ірі аграрлық көрмеге қатысты, деп хабарлады министрліктің баспасөз қызметі.
Халықаралық ауыл шаруашылығы көрме-жәрмеңкесі осымен 62-рет өткізіліп отыр. Дәстүрлі шараға Франциядан және серіктес елдерден мыңнан астам фермерлер, мал өсірушілер, өңдеуші кәсіпорындар мен агроөнеркәсіптік өнім өндірушілер жиналған. Алаң өзара белсенді пікір алмасу мен нақты келісімдер жасалатын орталыққа айналды.
Іскерлік бағдарлама аясында қазақстандық делегация ветеринария, селекция, генетика және агроөнеркәсіп кешенін цифрландыру мәселелері талқыланған конференциялар мен салалық кездесулерге қатысты. Әсіресе, сауда-экономикалық байланыстарды кеңейтуге, саланы технологиялық жаңғыртуға және мал шаруашылығына заманауи шешімдерді енгізуге баса назар аударылды.
«Франция–Қазақстан» бизнес-конференциясында сөз сөйлеген Аманғали Бердалин 2026-2030 жылдарға арналған мал шаруашылығын дамыту кешенді жоспар бекітілгенін жеткізді. Жоспарда жоғары өнімді асыл тұқымды мал сатып алу және ветеринариялық жүйені жаңғырту көзделгенін де айтты.
Кәсіпкерлік қауымдастық өкілдерімен кездесулер барысында Қазақстан жылқысының етін Еуропа нарығына шығару мәселесі бойынша келіссөздер жүргізілді. Сонымен қатар аква және ара шаруашылығы өнімдерін экспорттау мүмкіндіктері қарастырылуда.
Сурет: ашық ақпарат көзі
