Alatau Green Production ЖШС Маңғыстау облысында жалпы ауданы 6 гектар жылыжай кешенін салады. Жоба жыл бойы көкөніс өсіруді және сақтау инфрақұрылымын құруды көздейді. Бұл тұрғындарды өніммен қамтамасыз етуге, импортқа тәуелділікті азайтуға және азық-түлік бағасын тұрақтандыруға мүмкіндік береді, деп хабарлады аймақ әкімдігінің баспасөз қызметі.
Жылыжайда қызанақ, қияр, бұрыш, баклажан, шалғам және жапырақ салатын өсіру жоспарланған.
Сонымен қатар, өнімді ұзақ уақыт сақтауға арналған көкөніс қоймасы, жемістерді қысқа мерзімді сақтауға арналған қойма салынады.
Маңғыстау облысының әкімі Нұрдәулет Қилыбай кәсіпорын құрылтайшыларымен кездескенде жобаның өңір үшін стратегиялық маңызы жоғары екенін айтты.
«Жобаға заң аясында тиісті қолдау көрсетуге дайынбыз. Бұл өңірдің агроөнеркәсіптік әлеуетін арттыруға бағытталған маңызды қадам. Бірлескен жұмыстың нәтижесінде жобаны сапалы әрі тиімді жүзеге асыруға толық мүмкіндік бар», – деді Нұрдәулет Қилыбай.
Сурет: облыс әкімдігі
