Шығыс Қазақстан облысында асыл тұқымды сиыр мен қой саны көбейген. Өңірлік ауыл шаруашылығы басқармасының мәліметінше, асыл тұқымды ірі қара 3,4%-ға өсіп, 43 363 басқа жеткен. Ал, қой 5%-ға көбейіп, 62 074 бас болыпты.
Қазіргі таңда асыл тұқымды ірі қараның жалпы табындағы үлесі – 12%, қой – 13,6%. Өсім жергілікті селекциялық жұмыстың дамуына, шетелден және басқа өңірлерден жоғары өнімді мал әкелуге байланысты болған.
Асыл тұқымды ірі қара үлесінде Қазақтың ақбас сиырының саны басым. Аймақтағы үлесі 60%-дан асады екен. Сондай-ақ, Герефорд (4,4%), Абердин-ангус (3,2%), лимузин және қалмақ тұқымдары бар. Сүт бағытында Симменталь жетекші орында – шамамен 7,3 мың бас (16,7%) бар.
Асыл тұқымды малдың негізгі бөлігі Тарбағатай, Ұлан, Шемонаиха, Зайсан және Глубокое аудандарында.
2025-жылы аймаққа Германиядан 31 бас симменталь, Ресейден 160 бас Голштин және 6 бас герефорд әкелінген. Сондай-ақ Қазақстанның өзге облыстарынан 666 бас асыл тұқымды ірі қара сатып алынған.
Сурет: Agrotrend.kz
