Қостанай облысының Алтынсарин, Әулиекөл, Б.Майлин және Қостанай аудандарында бес тауарлы сүт фермасының құрылысы жүргізіп жатыр. Аталған жобаларға 20,7 млрд теңге көлемінде жеңілдетілген несие бөлінген. Бұл туралы облыс әкімдігі хабарлады.
2024-жылы өңірде жылына 19 мың тонна сүт өндіретін үш тауарлы сүт фермасы пайдалануға берілген болатын. Биыл шілде айында Федоров ауданында 600 басқа арналған ферма іске қосылды. Сондай-ақ Меңдіқара ауданында 1200 басқа арналған сүт фермасының құрылысы аяқталды. Жыл соңына дейін Алтынсарин ауданында тағы екі ферма іске қосылады.
Соңғы үш жылда облыстағы ауыл шаруашылығының жалпы өнімі 1,6 есеге өсіп, 1,1 трлн теңгеге жеткен. Биыл саланы дамытуға 207 млрд теңге бөлінген, бұл өткен жылмен салыстырғанда 20%-ға көп.
Егін жинау науқанының қорытындысы бойынша аймақта 7 млн тонна астық жиналып, Қостанай облысы екінші орынға шықты.
Сурет: Agrotrend.kz
