Ақтөбенің индустриялық аймағында тыңайтқыштар мен өсімдіктерді қорғау құралдарын шығаратын «Ecosystem» зауытының құрылысы аяқталды. Жоғары технологиялылығымен ерекшеленетін инвестициялық жоба өңірдің агроөнеркәсіп секторы үшін өте маңызды. Бұл туралы аймақ әкімдігінің баспасөз қызметі хабарлады.
Инвестициялардың жалпы көлемі 564,6 млн теңге. Кәсіпорын жылына 500 текше метр гербицид, 1,5 мың текше метр сұйық тыңайтқыш, сондай-ақ 50 текше метр қосалқы өнімдер шағара алатын өндірістік қуатқа ие. Құрылыс кезеңінде 50 жұмыс орны ашылды, ал 30 адам тұрақты жұмысқа орналасты.
Жобаның бірегейлігі оның кешенді тұжырымдамасында. Бір алаңда дайын өнім қоймасы мен заманауи өндірістік цех орналасқан. Барлық нысандар техникалық паспорт алып, ресми түрде пайдалануға берілген.
«Мұндай кәсіпорынды құру – импорттық өнімге тәуелділікті азайтуға және фермерлерді сапалы отандық агрохимикаттармен қамтамасыз етуге мүмкіндік береді. Жоба өңірдің индустриялық даму стратегиясының бір бөлігіне айналды», — делінген әкімдік таратқан ақпаратта.
