Вице-премьер Серік Жұманғариннің төрағалығымен өткен егін жинау науқаны бойынша жедел штабта жиын-терімді үздіксіз жүргізу үшін фермерлерді барлық қажетті құралдармен қамтамасыз ету мәселесі қаралды, деп хабарлады Ауыл шаруашылығы министрлігінің ресми сайты.
Ауа райының қолайлы болуының арқасында 27 қыркүйектегі жағдай бойынша негізгі астық егетін өңірлерде Қазақстанда 13 млн га жуық алқап немесе 75%-ы жиналды. Егін жинау науқанын қазан айының соңына дейін аяқтау жоспарланған.
Өнімді кептіру агрегаттары үшін арзандатылған дизель отыны мен сұйытылған газды тиеп, жөнелту және 4-класты арпа мен бидайдың бағасы – жедел штаб отырысында қаралған негізгі мәселелер болды.
Ауыл шаруашылығы вице-министрі Азат Сұлтанов хабарлағандай, 27 қыркүйекте элеваторларға 3,376 млн тонна астық түсті, оның 2,476 млн тоннасы – бидай. Бидайдың жалпы көлемінде 1,4 млн тоннасы 3-класты бидай (56,2%), 701,4 мың тонна – 4-класты (28,3%), 263,1 мың тонна – 5- класты (10,6%) астық. Қамбаға түскен арпаның 95%-ға жуығы – 2- класты арпа.
4-5 класты бидай жинауды ұлғайту перспективасын ескере отырып, шаруалар осы астықтың форвардтық сатып алу бағасын мүмкіндігінше ерте жариялауды сұрап отыр. Серік Жұманғарин Азық-түлік корпорациясына келесі аптада форвардтық сатып алу бағасын жариялауды тапсырды.
Негізгі астық егетін өңірлерге астық кептіру агрегаттарының жұмысы үшін арзан бағада сұйытылған газ жеткізу басталды.
