Премьер-министр Олжас Бектеновтің төрағалығымен өткен Үкімет отырысында мал шаруашылығы саласындағы ветеринариялық бақылау шаралары, сондай-ақ осы саланы цифрландыру үдерістері қаралды. Ауыл шаруашылығы министрі Айдарбек Сапаров баяндама жасаса, саланы цифрландыру бойынша жүргізіліп жатқан жұмыстар туралы Цифрлық даму, инновациялар және аэроғарыш өнеркәсібі министрі Жасұлан Мәдиев айтып берді, деп хабарлайды Primeminister.kz.
Премьер-министр өңірлерде сапалы ветеринариялық инфрақұрылымның қажеттігін, сонымен бірге аурулардың алдын алу мақсатында уақытылы ветеринариялық вакцинациялау үшін жағдайлар жасалуға тиіс екенін атап өтті. Ашықтықты қамтамасыз ету, мал шаруашылығы өнімдерін бақылау және есепке алу тиімділігін арттыру үшін процестерді цифрландырудың маңыздылығы айтылды.
«Ветеринариялық қауіпсіздік өнімді экспорттық нарықтарға шығарудағы негізгі шарт. Сонымен қатар сырттан әкелінетін мал өнімдеріне бақылауды күшейту қажет. Биыл жүргізіліп жатқан Ұлттық ауыл шаруашылығы санағының нәтижелері цифрлық платформаларға интеграциялануы керек», — деді Олжас Бектенов.
Үкімет отырысының қорытындысы бойынша Премьер-министр ауыл шаруашылығы жануарларын толық вакцинациялауды тапсырды.
Олжас Бектенов барлық өңірлерде сапалы және қолжетімді ветеринариялық құралдар жеткілікті көлемде болуға тиіс екенін де атап өтті. Ол үшін ең алдымен отандық өндірушілерді ынталандыру маңызды. Ауыл шаруашылығы министрлігіне өңір әкімдіктерімен бірлесіп, осы жылдың 1 қарашасына дейін ауыл шаруашылығы жануарларының деректер базасына верификациялау міндеті қойылды.
Ауыл шаруашылығы, Цифрлық даму, инновациялар және аэроғарыш өнеркәсібі министрліктеріне жыл соңына дейін жануарлар мен мал шаруашылығы өнімдерінің тасымалына байланысты барлық процестерді жүз пайыз цифрландыру тапсырылды. Сондай-ақ үздіксіз қадағалап отыру жүйесін енгізіп, деректер базаларының барлығын бірыңғай цифрлық платформаға интеграциялау міндеті қойылды.
Сурет: Primeminister.kz
