Биыл Солтүстік Қазақстан облысында «Ауыл – ел бесігі» бағдарламасымен шекарадағы елді мекендерді дамытуға 7 млрд теңге бөлінді, деп хабарлайды 24KZ. Оған 27 жоба жүзеге асады.
Бұл шалғайда жатқан ауылдарда қордаланып қалған мәселелерді шешуге мүмкіндік берді. 2027-жылға дейін өңірде жыл сайын кемінде 50 ауылды жаңғырту жоспарланып отыр.
«Жалпы қазір қолдағы ақпарат бойынша 50-ге жуық елді мекен осы шекара беткейлерінде орналасқан. Шекаралық аймақтардағы ауылдарды сақтап қалуға болады. Бірақ оған жекелеген адамдардың көмегі жеткіліксіз. Оған биліктің тарапынан, Үкіметтің, мемлекеттің тарапынан кәдімгідей арнайы бағдарлама жасалу керек», — дейді қала тұрғыны Өмір Есқали.
«2000-2009-жылдар аралығында 139 ауыл жойылып кеткен. Енді 635 елді мекеннің 140-ы болашағы жоқ ауыл деп танылған. Енді болашағы жоқ ауылды осы келешегі кемелденген елді мекендердің қатарына жатқызатын болсақ, мына шекарадағы ауылдар біраз дұрысталып, экономика болсын, мәдениет болсын, мемлекеттің дамуына өзіндік үлесін қосар еді», — дейді қала тұрғыны Самрат Құскенов.
«Енді осы ауылдарды дамытуға келгенде, меніңше, ең алдымен осы ауылдардағы инфроқұрылым, мәдени-әлеуметтік жағдайдан бөлек, мына экономикалық белсенділікті де арттырған жөн деп ойлаймын. Ауылда кәсіпорындар, шаруашылықтар, өндіріс орындары көптеп ашылса. Ұлттық қауіпсіздік жағынан да бұл өте күрделі мәселе» — қала тұрғыны Диас Аяған.
