Ақмола облысының Ақкөл қаласында мал азығына арналған протеин өндіретін жаңа зауыттың салтанатты ашылу рәсімі өтті. «Агро Протеин» ЖШС жүзеге асырған инвестициялық жоба агроөнеркәсіп кешенді дамытуға және жем-шөп қоспаларының импортқа тәуелділігін төмендетуге бағытталған. Айта кетейік, жобаны «Бәйтерек» холдингінің еншілес компаниясы — Аграрлық несие корпорациясы қаржыландырған.
Кәсіпорын айына 150 тоннадан астам шикізат өндіретін қуатқа ие. Алдағы уақытта өндірісті кеңейтіп, екінші желіні іске қоспақ. Бұл құрама жем мен монокорм шығарады. Өндірістің негізі – сиыр мен жылқының терілерін қайта өңдеу. Зауыт шығаратын протеин құсқа, балыққа және малға беріледі. Рационға протеин қосу дәстүрлі жемнің тиімділігін 40%-ға дейін арттырады, бұл өз кезегінде мал және балық шаруашылықтарының өнімділігін едәуір арттырады.
Заманауи жабдықтар мен инновациялық тәсілдер жоғары сапалы өнім шығаруға мүмкіндік береді. Өнімге мал шаруашылығында ғана емес, аква мәдениетте де сұраныс жоғары. Қазірдің өзінде балық өсіру кәсіпорындарымен алғашқы келісімшарттар жасалды, сүт саласы бойынша да жұмыстар жүргізілуде.
Сурет: Agrotrend.kz
