Биыл Қазақстанда рекордтық 1,1 млн тонна қант қызылшасын жинау жоспарлануда. Бүгінгі таңда егін жинау жұмыстары қарқынды түрде жүріп жатыр, деп хабарлайды Ауыл шаруашылығы министрлігінің баспасөз қызметі.
Алайда, өнімді қабылдау кезінде кезекті ұзақ күтуге тура келген. Осыған байланысты қиындықтар туындап, фермерлердің наразылығын тудырды.
ҚР Премьер-министрі Олжас Бектеновтың тапсырмасы бойынша Ауыл шаруашылығы министрлігі мен Жамбыл облысының әкімдігі жағдайды шешу үшін бірқатар шараларды қабылдады.
Бірінші – 10-қазаннан бастап Меркі қант зауытының қант қызылшасын қабылдаудың тәуліктік қуаты қосымша 4,5 мыңнан 5,9-6 мың тоннаға дейін ұлғайтылды.
Екінші – Меркі қант зауытының акционерлерімен бұрын бекітілген кесте бойынша қант қызылшасын қабылдау туралы уағдаластыққа қол жеткізілді. Бұл фермерлердің қызылшаны өңдеуге жеткізуін реттеуге жол ашады.
Үшінші – 100 км-ден астам қашықтықтағы шаруашылықтарға көлік шығындарын өтеу үшін келісіне 3 теңгеден төленетін болады. Меркі зауыты биыл 450 мың тонна қызылшаны қабылдайды.
Бүгінгі таңда қант зауыттары 362 мың тонна қызылшаны (Меркі – 116 мың тонна, Көксу – 129 мың тонна, Ақсу – 117 мың тонна, оның ішінде Жамбыл облысынан 9,6 мың тонна) өңдеуге қабылдады.
Үкімет қант қызылшасының барлығын Қазақстанның қант зауыттары қабылдайтынына кепілдік береді.
Естеріңізге сала кетейік, Премьер-Министр Олжас Бектеновтың төрағалығымен қант қызылшасын жинау қарсаңында бірнеше кеңес өткізілген болатын. Соның нәтижесінде АШМ облыс әкімдіктерімен және зауыттармен бірлесіп қант қызылшасын жеткізу жоспары мен қабылдау кестесі әзірледі. Қант зауыттарын айналым қаражатымен қамтамасыз ету үшін қажетті нормативтік-құқықтық актілер алдын ала қабылданды. Меркі қант зауытының қуаттылығының жетіспеушілігін ескере отырып, Жамбыл облысының 100 мың тонна қант қызылшасын Жетісу облысындағы Ақсу қант зауытына қайта жеткізу туралы шешім қабылданды. Бұл ретте, фермерлерге көлік шығындарын өтеу мақсатында субсидиялау нормативі тоннасына 25 мың теңгеден 45 мың теңгеге дейін ұлғайтылды.
Айта кету керек, Қазақстанда жұмыс істеп тұрған 4 қант зауытының қазіргі қуаттарын жаңғыртуды қажет етеді.
2025-жылы Меркі қант зауытының қуаты 3 мыңнан 4 мың тоннаға дейін күшейтілетін болады.
Бірнеше жылда Тараз қант зауытында қант қызылшасын өңдеу бойынша технологиялық желі орнату, Көксу қант зауытының қуатын тәулігіне 4 мың тоннаға дейін арттыру жоспарлануда.
Сондай-ақ жақында Үкіметте Жамбыл облысында 1 млн тонна қант қызылшасын өңдеуді қамтамасыз ететін жаңа қант зауытын салу жобасы таныстырылды. Осы шаралардың барлығы жұмыс істеп тұрған қант зауыттарын жаңғырту арқылы ішкі нарықты қант импортына деген тәуелділікті едәуір төмендетуге мүмкіндік береді.
Сурет АШМ сайтынан
