Қызылорда облысында «HARVEST AGRO» агроиндустриалды кластерін құру жобасының алғашқы кезеңі іске қосылды, деп хабарлады аймақ әкімдігінің баспасөз қызметі. Жобаның бірінші кезеңінде 8,7 мың гектар суармалы жерге жүгері егілсе, екінші кезеңде 32 мың гектар алқапқа жүгері, соя және техникалық қарасора егіледі.
Жоба аясында 68 млрд теңгеден астам инвестиция тартылып, ауыл шаруашылығы дақылдарын терең өңдейтін заманауи өндіріс орны ашылады. Жаңа зауыт жоғары технологиялармен жабдықталып, 140 адамды тұрақты жұмыспен қамтиды.
Бұл бастама ауыл шаруашылығын дамытуға, суармалы жер көлемін ұлғайтуға және өңделген өнім экспортын арттыруға бағытталған. Қазіргі таңда 30 мың гектар жер игерілуде, ал алдағы уақытта бұл көрсеткішті 300 мың гектарға дейін жеткізу жоспарланып отыр.
Сондай-ақ егін өсірумен қатар өнімді өңдеу, сақтау, тасымалдау және өткізу процестері біртұтас жүйе ретінде дамытылады.
Бүгінде негізгі инфрақұрылымдық жұмыстар қарқынды жүріп жатыр. Қараөзек өзенінен су арналары тартылып, 142 жаңбырлатып суару қондырғысы орнатылуда. Бұл су ресурстарын 30 пайызға дейін үнемдеуге көмектеседі.
Егіс алқаптарын тиімді басқару мақсатында цифрлық жүйелер мен жасанды интеллект элементтері енгізілуде. Алғашқы кезеңде 80 мың тоннаға дейін жүгері өнімін алу жоспарланған.
Аталған жоба – елімізде ірі агроөнеркәсіп кластерін қалыптастыруға бағытталған маңызды бастамалардың бірі.
Сурет: облыс әкімдігі
