Қазақстан пилоттық жоба ретінде Монғолиядан 500 мың бас ешкі сатып алуға қызығушылық танытты. Бұл ет және басқа да мал шаруашылығы өнімдерін терең өңдеу саласындағы экспортқа бағдарланған агроөнеркәсіптік кооперацияның бірлескен бастамасы болады, деп хабарлады ҚР Сыртқы істер министрлігінің баспасөз қызметі.
Моңғол тарапының шақыруымен Қазақстан Республикасы Премьер-министрінің орынбасары – Сыртқы істер министрі Мұрат Нұртілеу Моңғолияға ресми сапармен барған еді.
ҚР СІМ мәліметінше, Моңғолияның Сыртқы істер министрі Батмунхийн Батцэцэгпен кездесуде екі ел президенттерінің тауар айналымды 500 млн долларға дейін жеткізу жөніндегі міндеті талқыланды. Тараптар оған жету жолдарын белгіледі.
Мұрат Нұртілеу іскерлік байланыстарды жандандыруды ұсынды, сондай-ақ моңғол компанияларын өзара тиімді ынтымақтастыққа шақырды.
«Бүгінгі таңда қазақ-моңғол қатынастары үлгілі достық сипатқа ие. Біздің арамызда шешілмеген сұрақтар жоқ. Бұл біздің сенімімізді нығайту және орнықты даму үшін пайдалануымыз керек капиталымыз», – деді Мұрат Нұртілеу.
Сурет: unuudur.mn
