Қазақстанда егін жинау науқаны жалғасып жатыр. Қазіргі таңда дәнді және дәнді-бұршақты дақылдардың 81,5%-ы, яғни 12,7 млн гектар алқап жиналды. Орташа өнімділік гектарына 14,6 центнерден айналып 18,6 млн тонна астық қамбаға құйылды. Бұл туралы Ауыл шаруашылығы министрлігінің баспасөз қызметі хабарлады.
Биыл еліміздің жалпы егіс алқабы 24,2 млн гектарға жетіп, өткен жылмен салыстырғанда 600 мың гектарға артты. Оның ішінде 15,6 млн гектарға дәнді, 5,2 млн гектарға майлы және 3 млн гектарға мал азығы дақылдары егілді.
Биылғы өнімнің 4,9 млн тоннасы лицензияланған астық қабылдау кәсіпорындарына өткізілді. Бұл өткен жылдың сәйкес кезеңінен 20%-ға көп. Қабылданған астықтың 74%-ын 3-сыныпты, 20%-ын 4-сыныпты, 6%-ын 5-сыныпты астық.
Майлы дақылдар бойынша да жұмыстар қарқынды жүріп жатыр: 2,2 млн гектардан 2,2 млн тонна өнім жиналды. Сонымен қатар 2,9 млн тонна көкөніс, 2,5 млн тонна картоп және 2,3 млн тонна бақша дақылдары жиналды.
Егін жинау науқанына еліміз бойынша 130 мың трактор, 29 мың астық жинайтын комбайн жұмылдырылған.
Минералды тыңайтқыштарды жеткізу жұмыстары да жалғасуда. 2026 жылға жоспарланған 2,3 млн тонна тыңайтқыштың 2,1 млн тоннасына келісімшарт жасалды, бұл жоспардың 90%-ы.
Сурет: Agrotrend.kz
