Биыл егін егу мен күзгі жиын-терім жұмыстарын жүргізуге 700 млрд теңге бөлінді. Бүгінгі таңда оның 470 млрд теңгесі фермерлерге берілді. 100 млрд теңге өткен жылдардағыдай ақпанда емес, ерте қаржыландыру жұмыстары жүргізіліп, 2024 жылдың желтоқсан айында беріліп қойған. Бұл туралы «Бәйтерек» ҰБХ» АҚ Ауыл шаруашылығы және тұрғын үй-құрылыс бағдарламалары департаментінің директоры Руслан Төлегенов мәлімдеді.
Несие жылдық 5% мөлшерлемемен беріледі және қайтару мерзімі келесі жылдың наурыз айына дейінгі аралықты қамтиды. Несиені Аграрлық несие корпорациясынан, екінші деңгейлі банктер, несие серіктестіктері, аймақтық инвестициялық орталықтар және әлеуметтік-кәсіпкерлік корпорациялар арқылы алуға болады.
«Егер фермердің қоятын кепіл мүлігі жеткіліксіз болса, онда «Бәйтерек» холдингінің еншілес компаниясы — «Даму» кәсіпкерлікті дамыту қорының кепілін пайдалануға болады. Ол несие сомасының 85% мөлшерінде кепілдік береді. Менің айтарым, біздің екі еншілес компаниямыздың синергиясы қаржыландырудың қолжетімділігін едәуір кеңейтуге мүмкіндік берді, бұл көптеген жылдар бойы ауыл шаруашылығы тауарын өндірушілерге жетіспеді және саланың өсуін тежеп келді», — деді Руслан Төлегенов.
Бұдан бөлек «ҚазАгроҚаржы» арқылы ауыл шаруашылығы техникасын сатып алуға 5% мөлшерлемемен жеңілдікпен қаржыландыру бағдарламалары жалғасуда. Отандық ауыл шаруашылығы техникасына басымдық беріледі. Компания биыл лизингтік бағдарламалары бойынша 250 млрд теңге көлемінде қаржыландыру өнімін ұсынады. Бүгінгі таңда 108 млрд теңгеден астам сомаға 5,8 мың техниканың лизингтік шарты жасалды.
Сурет: Agrotrend.kz
