Астанада ауыл әкімдерінің қатысуымен өткен диалог-платформада ауылды дамыту мәселелері талқыланып, негізгі аграрлық міндеттер айқындалды. Іс-шарада Мемлекет басшысы Қасым-Жомарт Тоқаев сөз сөйлеп, ауыл әкімдері институтын жетілдіру, ауыл инфрақұрылымын жаңғырту және агроөнеркәсіп кешенінің әлеуетін арттыру жөнінде нақты тапсырмалар берді. Бұл туралы Президенттің баспасөз қызметі хабарлады.
Президент ауыл аймақтарына көрсетіліп жатқан қолдаулар мен соңғы жылдардағы оң өзгерістерді атап өтті. Оның айтуынша, ауыл тұрғындарының өмір сапасын жақсартуға бағытталған кешенді жоспарлар жүйелі түрде іске асуда.
Мемлекет басшысы келтірген деректер бойынша:
- 2021-жылдан бері 864 медициналық нысан салынды;
- 388 жаңа мектеп ашылды;
- 2023-жылы 2 мыңға жуық ауыл мектебі сапалы интернетке қосылды;
- ауылдарға қомақты инвестициялар тартылып, инфрақұрылым жаңарып келеді.
Мемлекет басшысы агроөнеркәсіп кешеніндегі өсімге де назар аударды.
“Ауыл шаруашылығының жалпы өнімі алты жылда 1,5 еседен аса өсіп, 8,3 триллион теңгеге жетті. Биыл шаруаларға 1 триллион теңге көлемінде мемлекеттік қолдау көрсетілді. Мұндай деңгейдегі қолдау әлемде сирек кездеседі”, – деді Президент.
Мемлекет басшысы ауылдардың өзін-өзі қамтамасыз ету деңгейі артқанын, бірақ салада әлі де ауқымды жұмыстар тұрғанын атап өтті.
Аталған диалог-платформа ауыл әкімдері үшін тәжірибе алмасу, салалық мәселелерді талқылау және ауылдарды тұрақты дамытуға бағытталған жаңа тәсілдерді қалыптастыруға мүмкіндік береді.
Сурет: Ақорда
