Өскеменде Шығыс Қазақстан облысы бойынша май өнеркәсібі саласында заманауи және ең жоғары технологиялы кәсіпорындардың бірі саналатын ALTAI MAI толық циклді май экстракциялық зауытының салтанатты ашылуы болды. Бұл туралы облыс әкімдігінің баспасөз қызметі хабарлады.
Жаңа кешен майлы дақылдарды өңдеудің шикізатты қабылдаудан бастап оны дайындау, экстракциялау, рафинациялау және дайын өнімді қаптауға дейінгі барлық кезеңдерін қамтиды.
Бұл Аграрлық несие корпорациясы қаржыландырған инвестициялық жоба. Жалпы инвестиция көлемі 26 миллиард теңгеден асады. Оның 2,5 миллиард теңгесі жергілікті бюджеттен бөлінген.
Кәсіпорынның өндірістік қуаттылығы – тәулігіне 500 тонна күнбағыс дәні. Зауыт өсімдік майлары, шрот және пеллеттер өндіреді, бұл шикізатты тиімді пайдалану мен ішкі және сыртқы нарықта сұранысқа ие өнім түрлерін кеңейтуге мүмкіндік береді.
Компания өкілдері әрбір шикізат партиясы көпсатылы сапа бақылауынан өтетінін, өндіріске экологиялық таза технологиялар енгізілгенін, олар қоршаған ортаға кері әсерді азайтып, халықаралық стандарттарға сәйкес келетінін айтады.
Сурет: облыс әкімдігі
