Түркістан облысында құны 111,1 млн доллар болатын ет кластерін құру жоспарланып отыр. Бұл туралы Қазақстанның жаһандық инвестициялар жөніндегі KGIR-2026 дөңгелек үстелінде өңір әкімдігі мен «Nurym Group» ЖШС меморандумға қол қойған кезде белгілі болды, деп хабарлады Үкіметтің баспасөз қызметі.
Шымкентте өткен жиында жалпы құны 4,8 млрд доллар болатын 22 құжатқа қол қойылды. Олардың қатарында инвестициялық келісімдер, меморандумдар және түрлі саладағы жобаларды жүзеге асыру жөніндегі уағдаластықтар бар.
Іс-шараға 40-тан астам елден 500-ден астам инвестор мен бизнес өкілі қатысты. Премьер-министр Олжас Бектенов Қазақстан тәуелсіздік жылдарында шамамен 500 млрд доллар тікелей шетелдік инвестиция тартқанын, оның 100 млрд доллардан астамы соңғы бес жылда келгенін атап өтті.
Үкімет басшысы инвестиция тартудың басым бағыттары ретінде агроөнеркәсіптік кешенді, ауыл шаруашылығы өнімдерін өңдеуді және азық-түлік өндірісін атады.
Сондай-ақ Қазақстанда Carlsberg Group сусын өндірісін іске қосса, Harvest Agro Holding ірі агроөнеркәсіптік кластер қалыптастырып жатыр. Ал Mars компаниясы жем өндірісін құруда.
Сурет: Agrotrend.kz
